Fahanka Wakhtiga iyo fariinta waayaha. WQ: Ciise Maxamuud Geelle “Ciise Waddani”
January 23, 2020 - Written by C M

Muddada jiritaanka jidhka basharka iyo nagaanshaha ruuxdu xilliga uu gaadho ayaa laba siyood u muuqda:-

1.     Mar waxa aynu ku eegnaa dhaayo xaqiiqo ah

Marka aynu qiimaynayno wakhtiga tegey, iyo xilliga aynu miisaamayno inta aynu jirnay inaga oo aan tirinayn cadad maalmo ama sanado ah, laakiin ka qiyaas qaadanayna masaafada xasuuseheena iyo taxanihii dhacdooyinkeenu inta ay isu jireen, waxa aynu u aragnaa maalmo orod badan oo sida hilaaca inoo dhaafay, waa marka nayla weydiiyo aduunka, aakhiro lafteeda wey taallaa jawaabta lagu tilmaami doono maalin ama maalin badhkeed wakhtigii nagaanshaha ee aduunyo.

2.     Marna waxa aynu ku eegnaa indho khayaaliya

Waxa jira dareen beena oo inoo sawira maalmo tiro badan, jaanis aad u weyn, iyo fursado muhiima oo wax kasta laga bogan karo, khayaaligaasi waxa uu kuu sheegaa in sanadadii lasoo dhaafay wakhtigu ordayey wax walibana cidhiidhi ahaayeen, laakiin sanadada soo socda uu jaanis badani jiro, waxase su,aashu tahay  Maxay ayuu sanadka soo socdaa kaga duwanyahay sanadkii tegey ?.

Tusaale ahaan; hadaad cid ku tidhaahdo sanad ka dib ayaynu hawshaas fulinaynaa waxay noqonaysaa mid ku culus, balse sanadka aad u qabatay haduu ugu muuqdo sidii sanadkii lasoo dhaafay waxay noqon lahayd mid la fudud oo la dhow.

Waa maxay fahanka wakhtigu ?

Labada aragtiyood ee aynu kor ku kala qaadnay oo la mideeyo waxa lagu fahmi karaa hab socodka wakhtiga iyo sidii loola macaamili lahaa, wakhtigu waa in aad u aragto uun wakhti!  kii kaa tegey, ka taaganka ah, iyo ka soo socdaba waa in aad ku eegto hal diirad, maankaagana aad ka dhaadhiciso in sanadka soo socdaa le,egyahay sanadkii ku dhaafay tiro ahaan iyo tayo ahaanba.

Sidaa awgeed wakhtigu masoo laabto, xilliguna xilli kele ma xanbaaro, hawshii wakhtigeedu shalay ahaa maanta qaban mayso, sababtoo ah maanta hawl kele ayaa iska leh.

Sanadadu waa bilo isu tegey, biluhuna waa maalmo isu tegey, maalmuhuna waa saacado iso tegey, saacaduhuna waa daqiiqado isu tegey, daqiiqaduhuna waa il-biriqsiyo isu tegey, ilbiriqsi? Isha markii la daboolo/laysku qabto inta labada baal iskusoo socdaan wakhiga ay qaadato ayaa loo yaqaan il bidhiqsi am il biriqdeed.

Sidaa awgeed waxa aynu isku hawlnaa maareynta wakhtiga inaga oo aan fahmin wakhti waxa uu yahay, shaqada waxa aynu u qoondaynaa saacado inagoo aan ku darin wakhtiga diyaar garowga, wakhtiga sii socodka, wakhtiga jid ka talaabidda, iyo xitaa wakhtiga albaab furista oo qaadata ugu yaraan shan il-bidhiqsi, noloshaada si kasta oo aad tahay, iyo meel kasta oo aad joogto wakhtigu wuu kugu socdaa saacaduna ma nasato, wakhtigana waxad fahantay markad ula oroddo sida uu u ordayo.

Waa maxay fariinta waayahu ?

Waayaha nolosha iyo is daba wareega taariikhdu waa farriin adiga kugu socota, dhirta iyo dhismaha dhinaca galbeed hadhka iyo qabowga ku leh dhinaca barina kulaylka iyo bacadka kuleh iyo kala wareegooda saacado ka dib dhacaya waa farriin adiga kugu socota, abaarta iyo omoska indha bururka ah ee oonka iyo ooda-luulku jiro iyo isbedelka dooga iyo deegaanta ah ee bilo ka dib yimaadda waa fariin adiga kugu socota, dadkii aad garaadsatay iyaga oo ordaya oo muuqaal fiican iyo awood ay wax ku qabsadaan leh maantana soo gotay ee aan fadhiga ka kici Karin, waayeelnimo darteed iyo kuwii fir-fircoonaa oo goobaha caafimaadka laasimay, iyo kuwii aad wada joogi jirteen oo magacyadooda Alle ha u naxariisto la raacinayo, marka aad aragto arrimahaas oo dhan waa farriin adiga kugu socota, waana kii Ergiga Alle lahaa N.N.K.H ”Waxad u dhimanaysaan sida aad u seexataan waxaana laydiinsoo saarayaa sida aad usoo toostaan” Macnuhu waxa weeye seexashada iyo soo toosiddu waa fariin waayeed kugu socota oo tusaale u ah waxa danbeeya.

Qoraalkan yar kuma koobi karno farriin sidayaasha, laakiin fariinta waayaha ee kugu socota kuna lifaaqan is bedel kasta oo aynu soo xusnay waa mid u gogol xaadhaysa in is bedelkaagu soo socdo, macnaha in seeftu kusoo gaadhi doonto kuuna kaxayn doonto dhinaca loo wada socdo, hadii dadka qaar kula mid ahaa  gaboobay ama geeriyooday iyo hadii dunidii aad joogtay iyo dunida maanta aad joogtaa kala duni yihiin, maxaad sugaysaa? Soomalida ayaa tidhaahda “Nin qayrkii loo xiirow soo qoyso”.

Hadabo si aad u fahanto wakhtiga iyo la orodkiisa una dareensanaato in maalinta iyo habeenku yihiin doonyo shiraacan oo waxa aad ku rarato aad kala degayso mustaqbalka, waa in aad iska ilawdo fududaysiga hab-socodka wakhtiga, daqiiqad kastana aad ku sagootido ficil, maadaama aanay kugusoo noqonayn, sidoo kelena aad diyaar garow dhamaystiran kaga jawaabto farriimaha ay ku farayaan is bedellada dhulka, dadka, iyo duunyada.

Qalinkii:   Hal-abuur Ciise Maxamuud Geelle (Ciise Waddani)

———————————————————–

Gacanlibaaxnews masuul ka ma aha habka iyo curinta qoraalkan, ee waa fikir iyo aragti u gaar ah qoraha. Waxa se Gacanlibaaxnews masuuliyadi ka saran tahay hubinta iyo ka la haadinta ka hor inta aanan idiin soo baahin qoraalka.

COMMENTS