Sida ay sheegeen guutada Abu Bakr al-Siddiq oo ah maleeshiyaad maamula gobolka buuralayda Koofurgalbeed dalka Libya ee Zintan Saif al-Islam ayaa la sii dayay Sabtidii.

Saif oo 44 sano jir ah ayaa ah carruurta uu dhalay Qaddafi kan ugu saameynta badnaa waxaana lagu qabtay bishii November 2011 Zintan isagoo doonayay inuu u gudbo dalka Niger ee deriska la ah wadanka Libya kadib markii la afgambiyay xukuumadii uu hogaamiyaha u ahaa Gaddafi.

Intii uu ku xirnaa Zintan ayaa Saif al-Islam waxaa maxkamad ku taal magaalada Tripoli ay ku xukuntay dil bishii July 2015 kadib markii maxkamad la soo taagay saraakiil badan oo ka mid ahaa xukuumadii Qaddafi.

Sidoo kale, waxaa doondooneysa Saif maxkamada caalamiga ah ee dambiyda dagaalka eedeymo la xiriira dambiyo dagaal iyo dambiyo ka dhan ah aadanaha.

Tan iyo markii uu soo dhamaaday xukunkii Qaddafi ee afartanka sano 2011,Libya waxaa ka jirey maamul aan awood lahayn kaasoo ay maleeshiyaad hubeysan ay kala maamulaan qeybo kala duwan oo dalka Libya ah.