Dawladda Sucuudiga oo sheegtay inay fashilisay weerar la la damacsanaa masjidul-xaraamka
June 24, 2017 - Written by

Makka (GLN):- Wasaaradda Arrimaha Gudaha ee Boqortooyada Sacuudi Carabiya ayaa sheegtay in ciidamada ammaanka ay fashiliyeen weerar argagixiso oo la damacsanaa in lagu qaado Masaajidka barakeysan ee Makka.

Ciidamada ammaanka ayaa weeraray dhismo uu deganaa qofka rabay inuu weeraro masaajidka, waxaana markii ay ciidamada hareereeyeen, kadib uu is qarxiyay.

Ninka is qarxiyay ayaa la sheegay inuu diiday inuu is dhiibo, waxaana qaraxa ku dhaawacmay illaa 11 ruux oo isugu jiray dadkii guriga degenaa iyo shan ka mid ah ciidamada booliska.

Dhismaha uu ninka isku qarxiyay ayaa bur bur xooggan soo gaaray, waxaana qeybo ka mid ah uu ahaa mid saameeyay qaraxa.

Saraakiisha ayaa sheegay in saddex goobood ay isku diyaarinayeen kooxaha damacsanaa inay weeraraan Xaramka, waxaana labo ka mid ah ay degenaaayeen xaafad ku dhow Masaajidka Makka, halka midka kalena uu degenaa goob kale.

Ciidamada ammaanka ayaa xabsiga dhigay shan ruux oo looga shakisan yahay inay weerarada qorsheynayeen, waxaana socota baaritaano adag.

Malaayiin Muslimiin ah oo ka kala timid daafaha Caalamka ayaa isugu soo uruuray magaalada Maka, si ay dhamaadka bisha barakeysan ee Ramadaan u cumreystaan.

Bishii July 2016 ayay aheyd markii afar askari lagu dilay weerar is qarxin lagu qaaday meel ku dhow masaajidka barakeysan ee Madiina.

Share

COMMENTS
Gacanlibaaxnewscom