Mashruucan oo muhiimad weyn u leh bulshada deegaanka ayaa qayb ka ah barnaamijka ballaadhan ee wasaaraddu ku horumarineyso adeegyada biyaha nadiifta ah ee gobollada dalka, si loo yareeyo biyo la’aanta iyo dhibaatooyinka ka dhasha.

Si loo qiimeeyo heerka uu marayo mashruuca, Agaasimaha Guud ee Wasaaradda Horumarinta Khayraadka Biyaha, oo ay weheliyaan qaar ka mid ah injineerrada iyo saraakiisha wasaaradda, ayaa safar shaqo ku tegay gobollada Togdheer iyo Daad-Madheedh, halkaas oo ay kormeer iyo indho-indhayn shaqo ku sameeyeen goobta qodista ceelka.

Agaasimaha Guud ayaa ku ammaanay kooxaha farsamada dadaalka iyo xirfadda ay muujiyeen, isagoo sheegay in ceelkan cusub uu noqon doono il muhiim ah oo biyo nadiif ah u keenta bulshada deegaanka Qolqol iyo nawaaxigeeda.

Ugu dambayn, Agaasimuhu wuxuu bulshada deegaanka ku boorriyay in ay ilaashadaan ceelka iyo qalabka la xidhiidha, si mashruucu u noqdo mid waara oo faa’iido u leh jiilalka soo socda.