RSF Oo Xabsiga Dhigtay Sarkaal Lagu Eedeeyay Xasuuqa Shacabka Ee Al-Faashir
October 31, 2025 - Written by maamule

Kooxda hubeysan ee RSF (Rapid Support Forces) ee ka dagaallanta dalka Suudaan ayaa ku dhawaaqday in ay xabsiga dhigeen sarkaal lagu magacaabo Faatix Cabdalla Idris, oo sidoo kale loo yaqaan “Abu Lulu.”

Ninkan ayaa hore loogu eedeeyay inuu gacan ka geystay xasuuqyo iyo dilal ba’an oo ka dhan ah shacabka rayidka ah ee ku nool magaalada Al-Faashir, taas oo dhowaan ay RSF qabsatay.

Sawirro iyo muuqaallo laga faafiyay baraha bulshada ayaa muujiyay Abu Lulu oo dil toos ah ugu geysanaya dad rayid ah, taas oo dhalisay cambaareyn caalami ah iyo caro shacab.

Kadib cadaadis xooggan oo kaga yimid gudaha iyo dibadda, RSF ayaa maanta shaacisay in Abu Lulu la xiray, balse wali faahfaahin rasmi ah oo ku saabsan baaritaankiisa ama ciqaabtiisa lama bixin.

Tallaabadani waxay u muuqataa isku day ay RSF ku doonayso inay hoos u dhigto eedeymaha caalamiga ah ee loo jeediyay, kadib markii ay dunidu si adag u cambaareysay dilalka iyo xasuuqa ka dhacay gobolka Daarfuur.

Share

COMMENTS
Gacanlibaaxnewscom