Wareegto ka soo baxday Madaxtooyada ayaa lagu wargeliyey dhammaan Wasaaradaha, Hay’adaha Madaxa-bannaan iyo Wakaaladaha Dawladda in ay si degdeg ah u fuliyaan go’aankan, isla markaana ay muujiyaan u hoggaansanaan buuxda.

Go’aankan ayaa Madaxweynuhu qaatay isaga oo tixgelinaya xaaladaha abaaraha ba’an ee ka jira qaybo badan oo dalka ka mid ah, kuwaas oo si muuqata u saameeyey nolosha iyo dhaqaalaha bulshada. Abaaraha ayaa sababay biyo-yaraan, waxyeelo culus oo soo gaadhay xoolaha nool, barakac iyo culays nololeed oo ku yimid qoysas badan, gaar ahaan bulshada reer miyiga ah iyo danyarta.

Madaxweynuhu waxa uu ku boorriyey hay’adaha dawladda in ay muujiyaan masuuliyad qaran, wadajir, naxariis iyo dareen-qaybsi la xidhiidha xaaladda taagan, iyadoo mudnaanta koowaad la siinayo xaaladaha bini’aadannimo iyo danaha guud ee Qaranka.

Si kastaba ha ahaatee, wareegtada Madaxweynaha ayaa si gaar ah u caddeysay in munaasibadaha furitaanka mashaariicaha horumarineed ee Qaranku aanay ku jirin go’aankan, isla markaana ay sii socon karaan.

Go’aankan ayaa imanaya xilli ay dalka ka jiraan xaalado abaareed oo culus, kuwaas oo u baahan dadaal mideysan iyo ka-fogaansho kharashaad aan daruuri ahayn, si diiradda loo saaro wax ka qabashada xaaladda bini’aadannimo ee taagan.

Sidan waxa shaaciyey Xuseen Aadan Cige (Deyr), Afhayeenka Madaxtooyada Jamhuuriyadda Somaliland.