Sulaiman bin Abdul Aziz Al Rajhi, oo ah aasaasaha wadajirka ah ee Bangiga Al Rajhi, isla markaana ka mid ah ganacsatada ugu caansan Sacuudiga, ayaa ku deeqay $19 bilyan. Ganacsadahan 95 jirka ah, ayaa qayb weyn oo hantidiisa ah ($19 bilyan) u hibeyay arrimo samafal oo kala duwan, taasoo keentay in hantidiisa guud si weyn hoos ugu dhacdo isla markaana uu lumiyo darajadiisii bilyaneernimo.

Al Rajhi wuxuu go’aansaday in uu hantidiisa kala qaybiyo, isagoo nus siinaya carruurtiisa, halka nuska kale na uu u qoondeeyay samafal. Tallaabadan weyn ee deeqsinimada ah waxay keentay in qiyaastii 221 milyan oo Riyal Sacuudi ah (SAR) loo qoondeeyo Hay’adda Samafalka ee Sulaiman Bin Abdul Aziz Al Rajhi.

Hay’addu waxay diiradda saartaa dhowr arrimood oo muhiim ah, kuwaas oo ay ka mid yihiin:
Waxbarashada: Taageeridda dugsiyada, jaamacadaha, iyo deeqaha waxbarasho.
Diinta: Maalgelinta hawlaha iyo hay’adaha diimeed.
Caafimaadka: Ka qayb qaadashada dhismaha iyo hawlgelinta xarumaha caafimaadka.
Arrimaha Bulshada: Wax ka qabashada caqabadaha bulsho iyadoo loo marayo barnaamijyo gaar ah.

Hantida Hadda ee Sulaiman Bin Abdul Aziz Al Rajhi
Ka dib deeqihiisa waaweyn, hantida Al Rajhi waxaa lagu qiyaasaa $590 milyan. Inkastoo tani ay si weyn uga hooseyso heerkii uu hore u ahaa bilyaneer, hadda na waxay muujinaysaa sida uu uga go’an yahay inuu bulshada wax u celiyo isla markaana uu sameeyo saameyn wanaagsan oo waarta.
Samiira Yuusuf