Halka dadka badankoodu diyaarad raaci lahaayeen si ay u arkaan Northern Lights, Malik Al-Sultan wuxuu doortay hab ka duwan. Wuxuu go’aansaday inuu ka kaxeeyo gaadhigiisa Toyota Hilux magaalada Riyadh ee Sacuudiga ilaa Cirifka Waqooyi (Arctic Circle) ee Norway.

Malik ayaa sheegay in fikraddan ay ku dhalatay sanadkii 2017, xilli uu qoyskiisa kula sugnaa Switzerland. Markii uu arkay gaadhi wata taarikada dalalka Khaliijka oo ku sugan meel aad uga fog dalkiisa, wuxuu is waydiiyay inta uu isagu gaadhi ku safri karo.

Ugu dambayn, wuxuu riyadiisii u beddelay xaqiiqo. Isagoo wata Toyota Hilux 4×4 oo nooca 2020 ah, Malik wuxuu galay safar qaatay ku dhowaad saddex toddobaad, isagoo maray 23 waddan.

Safarkiisa oo dhererkiisu ahaa 3,728 mayl (ku dhowaad 6,000 km) wuxuu sii maray Turkiga, Austria, Switzerland, Faransiiska, Jarmalka, Sweden iyo dalal kale oo badan, ka hor inta aanu gaarin waqooyiga Norway.

Inkastoo uu la kulmay cimilooyin aad u kala duwan, laga bilaabo kulaylka saxaraha ilaa qabowga daran ee Arctic-ka, Toyota Hilux ayaa si wanaagsan uga gudubtay dhammaan caqabadaha. Malik wuxuu sameeyay diyaargarow yar oo keliya, waxaana ka mid ahaa inuu ku rakibo taayiro gaar ah oo barafka loogu talagalay markii uu galay Norway.

Kadib kumannaan mayl oo uu wadada ku jiray, Malik wuxuu gaadhay magaalada Rana ee Norway, oo ku taalla waqooyiga Arctic Circle.

Halkaas ayuu ugu dambayn ku arkay muuqaalka uu sannadaha badan sugayay. Northern Lights ayaa cirka ka soo muuqday, iyadoo iftiinno cagaaran iyo guduudan ay cirka ku ciyaarayeen in ka badan 30 daqiiqo.

“Waxay ila ahayd sidii riyo oo kale,” ayuu Malik u sheegay Arab News markii uu ugu dambayn arkay dhacdadan dabiiciga ah ee cajiibka ah.

Inkastoo himiladiisu ahayd inuu arko Northern Lights, haddana safarka laftiisa ayaa noqday xusuusta ugu weyn. Isagoo ka gudbaya xuduudo badan, la qabsanaya dhulal iyo cimilooyin kala duwan, isla markaana maraya qaar ka mid ah waddooyinka ugu fog Yurub, safarku wuxuu isu beddelay tacabur ka weyn dalxiis caadi ah.

Malik Al-Sultan wuxuu caddeeyay in mararka qaar jidka dheer uu ka qiimo badan yahay meesha la gaadhayo, isla markaana waayo-aragnimada qaarkeed ay mudan yihiin mayl kasta oo loo safro.

Supercarblondie