Macallimiintu waa bini’aadam, khaladkuna waa dhici karaa. Hase yeeshee, khaladaadka qaarkood marka ay soo noqnoqdaan waxay abuuri karaan cabsi, niyad-jab iyo fasal aan waxbarashadu si wanaagsan uga hirgelin. Sidaas awgeed, waxaa muhiim ah in macallinku si joogto ah u qiimeeyo habka uu wax u dhigo, xidhiidhka uu ardayda la leeyahay iyo saamaynta ay dhaqamadiisu ku yeeshaan waxbarashadooda.

Qoraalkan waxaan ku soo bandhigaynaa tobanka khalad ee ugu halista badan ee macallimiintu sameeyaan xilliga waxbaridda iyo xalal wax-ku-ool ah oo lagaga hortagi karo. Ujeeddadu ma aha in macallinka la eedeeyo, balse waa in la xoojiyo kaalintiisa, la na dhiso fasal ay ardaydu ku dareemaan ammaan, caddaalad, dhiirrigelin iyo fursad ay si buuxda ugu kobciyaan awooddooda.

Tobanka khalad iyo xalkoodu waa kuwan:

1. Casharka oo aan hore loo sii qorshayn
   Macallinka aan diyaarsanayn wuxuu lumiyaa wakhtiga iyo dareenka ardayda.
   Xalka: Samee qorshe-cashareed leh ujeeddo, hab waxbarid iyo qiimayn cad.
2. Hadalka oo macallinka keliya ku koobnaada
   Ardaydu waxay noqdaan dhegaystayaal aan si firfircoon uga qaybgelin casharka.
   Xalka: Adeegso dood, su’aalo, shaqo-kooxeed iyo layliyo.
3. In ardayda oo dhan isku si loo baro
   Ardaydu isku karti, faham iyo hab waxbarasho ma aha.
   Xalka: Adeegso habab kala duwan, taageerana sii ardayda u baahan.
4. Ceebaynta ama bahdilka ardayga
   Waxay dhaawacdaa kalsoonida ardayga, ka na fogaysaa waxbarashada.
   Xalka: Khaladka si gaar ah oo ixtiraam leh u sax; dadaalkana ammaan.
5. Ciqaab iyo cabsi badan
   Cabsigelintu waxay abuuri kartaa fasal aamusan, balse ma abuurto waxbarasho wanaagsan.
   Xalka: Samee xeerar cad, caddaalad ah oo si joogto ah loo wada raaco.
6. Eexda iyo kala jeclaysiga ardayda
   Waxay dhaawacdaa caddaaladda, midnimada iyo kalsoonida fasalka.
   Xalka: Ardayda si siman u la dhaqan, ku na qiimee halbeeg cad.
7. In aan la hubin fahamka ardayda
   Dhammeystirka casharku macnaheedu ma aha inay ardaydu fahmeen.
   Xalka: Weydii su’aalo, samee qiimayn kooban, ardaydu na ha sharxaan waxa ay barteen.
8. Jawaabta khaldan oo lagu canaanto ardayga
   Tani waxay ardayda ka baqdin gelisaa inay su’aalo weydiiyaan ama fikirkooda dhiibtaan.
   Xalka: Khaladka u arag fursad waxbarasho, ku na dhiirrigeli iskudayga.
9. Nolosha dhabta ah oo aan casharka la la xidhiidhin
   Ardaygu wuxuu waayaa sababta uu maaddada u baranayo.
   Xalka: Adeegso tusaalooyin nololeed, dhacdooyin iyo hawlo la taaban karo.
10. In macallinku aanu aqbalin talo iyo isbeddel
    Hab waxbarid oo aan la cusboonaysiin wuxuu wiiqaa tayada waxbarashada.
    Xalka: Dhagayso ardayda, la tasho macallimiinta kale, qiimee habkaaga, aqoontana si joogto ah u kororso.

Gunaanad: Macallinka wanaagsan ma aha qof aan khaldamin; waa qof khaladkiisa garta, saxa, kana dhiga fursad uu isaga iyo ardaydiisuba ku horumaraan.

GLN/HM