Madaxweyne Cirro ayaa sheegay in kulamada diiradda lagu saaray amniga Badda Cas iyo Gacanka Cadmeed, xasilloonida Geeska Afrika, ilaalinta marin-biyoodyada muhiimka u ah ganacsiga caalamiga ah iyo sidii loo dhisi lahaa iskaashi qoto dheer oo waara oo dhex mara Somaliland iyo Maraykanka.

Madaxweynuhu waxa uu masuuliyiinta iyo khubarada uu la kulmay u sharraxay horumarka dhinacyada dawlad-dhiska iyo dimuqraadiyadda ee ay Somaliland samaysay muddada ka badan 33-ka sannadood. Waxa uu xusay in Somaliland ay hirgelisay doorashooyin xor ah iyo kala-guur siyaasadeed oo nabdoon.

Waxa uu tilmaamay in waayo-aragnimada Somaliland ay muujinayso in dimuqraadiyadda, dawladnimada iyo xasilloonidu yihiin tiirar isku xidhan oo muhiim u ah nabadda iyo horumarka gobolka.

Madaxweyne Cirro ayaa sidoo kale kulamada ku soo bandhigay muhiimadda istiraatiijiga ah ee Somaliland iyo Dekedda Berbera, isaga oo sheegay in dekeddu ku taallo meel u dhow mid ka mid ah marin-biyoodyada ugu muhiimsan dunida.

Waxa uu caddeeyey in Somaliland ay diyaar u tahay inay Maraykanka iyo saaxiibbadiisa kala shaqayso amniga badda, xasilloonida gobolka, ganacsiga iyo maalgashiga.

“Waxaan nahay dal dimuqraadi ah, xasilloon oo leh hay’ado shaqaynaya, kuna yaalla goob istiraatiiji ah; waxaanan diyaar u nahay iskaashi ku dhisan kalsooni, dano wadaag iyo mas’uuliyad wadajir ah,” ayuu Madaxweyne Cirro ku sheegay qoraal lagu baahiyey bogga Facebook-ga ee Madaxtooyada Somaliland.

Madaxweyne Cirro ayaa haatan socdaal shaqo ku jooga magaalada Washington ee dalka Maraykanka.