Sida ay sheegeen hay’adaha baaritaanka, Carlton Neal Johnson II ayaa weerarka ku bilaabay inuu toogto haweeney la rumeysan yahay inay ahayd hooyada ilmahiisa. Ilmihii goobta joogay wax dhaawac ah ma gaarin. Johnson ayaa sidoo kale dhaawacay laba shaqaale oo ka tirsanaa maamulka dhismaha, ka hor inta aanu wiishka u raacin dabaqa sagaalaad.

Dabaqaas ayuu ku dilay laba ka mid ah dadka dhismaha degganaa—Dale Henry Spry oo 63 jir ahaa iyo Muse A. Afrah oo 61 jir ahaa. Baarayaashu weli si rasmi ah uma xaqiijin in labada marxuum si gaar ah loo bartilmaameedsaday iyo in Johnson uu si kedis ah ugula kulmay marinka dabaqa.

Muuqaallada kamaradaha jirka ayaa muujinaya askarta oo dhex maraysa dhismaha, iyagoo raadinaya dhaawacyada iyo ninka hubaysan. Markii ay askartu gaareen dabaqa sagaalaad, Johnson ayaa kasoo baxay gees marinka ka mid ah, rasaasna ku furay. Laba askari—Joseph Michnowski iyo Yahye Mahmed Ahmed—ayaa rasaasta ku dhaawacmay. Booliiska ayaa rasaas kaga jawaabay, Johnson-na waxaa lagu dilay is-rasaasaynta.

Guud ahaan, Johnson wuxuu dilay laba qof, wuxuuna rasaas ku dhaawacay shan kale: haweeneydii la rumeysnaa inay ahayd hooyada ilmahiisa, laba shaqaale oo dhismaha ah iyo laba askari. Warbixintii ugu horreysay ee magaalada ayaa sidoo kale sheegtay askari saddexaad oo dhaawacmay, afar askari oo ay saameeyeen walax ama qiiq aan markaas la aqoonsan iyo laba askari oo ku dhaawacmay shil gaari xilli ay goobta ku sii jeedeen.

Dukumentiyada baaritaanka ayaa muujinaya in maamulka dhismuhu qiyaastii afar saacadood ka hor weerarka booliiska uga warramay iimayl hanjabaad ah oo la xiriiray Johnson iyo dacwad guri-ka-saaris ah oo ku socotay. Booliiska Minneapolis ayaa sheegay in 12:41 duhurnimo loo soo gudbiyey warbixin sheegaysa inuu Johnson ku hanjabay inuu toogan doono qof dhismaha degganaa iyo dad kale.

Warbixinta waxaa loo diiwaangeliyey “hanjabaad argagixiso,” balse looma qoondeyn tallaabo degdeg ah. Waxay weli maraysay habka ansixinta ee nidaamka diiwaannada booliiska markii Johnson uu rasaasta bilaabay abaare 4:36 galabnimo.

Johnson ayaa sidoo kale hore loogu baaray dhacdo bishii Juun la xiriirtay inuu hub soo bandhigay, balse xafiiska xeer-ilaalinta degmada wax dacwad ah kama uusan gudbin. Dadka deegaanka iyo dukumentiyada maxkamaddu waxay tilmaameen inuu hore ugu hanjabay deriska iyo shaqaalaha dhismaha, halka ugu yaraan hal qof uu dalbaday amar maxkamadeed oo lagaga ilaalinayo.

Baadhitaanku weli wuu socdaa, waxaana si gaar ah loo eegayaa sababta weerarka, cidda uu Johnson bartilmaameedsanayay iyo in hanjabaadihii hore wax looga qaban karay ka hor inta aysan toogashadu dhicin.