Hadda waxay go’aansatay in aanay mar kale u tartamin xilka guddoomiye ku xigeenka xisbiga. Sida uu weriyey VårtOslo, Maryam waxay sheegtay in cunsuriyadda iyo aflagaaddada ay muddo la kulmaysay ay ku noqdeen culays daal badan leh. Waxay diidday in cadaadis gudaha xisbiga ahi ku kallifay go’aankeeda, iyadoo sheegtay in ay taageero ka heshay gudaha iyo dibadda xisbiga.

Go’aankeedu wuxuu iftiiminayaa caqabadaha ay la kulmi karaan siyaasiyiinta asal ahaan ka soo jeeda bulshooyinka laga tirada badan yahay. Siyaasi kasta waa in lagu dhaliili karaa fikradihiisa iyo waxqabadkiisa. Laakiin cunsuriyadda iyo weerarrada qofnimo waxay dhaawacaan doodda siyaasadeed, waxayna dadka kale ku abuuri karaan cabsi ay kaga qaybqaataan arrimaha bulshada.

Ka hor inta aanay baarlamaanka gelin, Maryam waxay ka soo shaqaysay adeegyada daryeelka, hay’adda shaqada iyo daryeelka bulshada ee NAV, iyo adeegga ilaalinta carruurta. Waayo-aragnimadaas waxay siin kartaa faham dhow oo ku saabsan baahiyaha dadka iyo caqabadaha adeegyada bulshada.

Maryam waxay sii wadaysaa shaqadeeda xildhibaanimo, iyadoo Oslo ku matalaysa baarlamaanka Norway muddada 2025–2029. Waxay sidoo kale guddoomiye u tahay guddiga shaqada iyo arrimaha bulshada, oo ah mas’uuliyad muhiim u ah siyaasadaha saameeya nolol maalmeedka dadka.

Socdaalka siyaasadeed ee Maryam Xuseen, wuxuu dhiirrigelin u noqon karaa dhalinyarada Soomaaliyeed ee Norway ku nool, gaar ahaan gabdhaha doonaya inay siyaasadda ka qaybqaataan. Go’aankeeda waa in la ixtiraamaa, iyadoo xisbiyada iyo bulshaduba ay masuuliyad ka saaran tahay in la abuuro jawi ay dadka oo dhan fikradahooda si xor ah ugu soo bandhigi karaan.
HM