Sida lagu baahiyey The New York Times, Sahra Nuur oo la dhalatay Ilhaan iyo ugu yaraan hal qof oo kale oo qoyskeeda ka tirsan ayaa loo diray amarro sharci ah oo lagu dalbanayo xog, dukumenti ama markhaati la xidhiidha baadhitaanka.

Hawlgalkii gurigeeda waxaa fuliyey saraakiisha Hay’adda Baadhista Amniga Gudaha ee Maraykanka, oo loo soo gaabiyo HSI, iyagoo haysta amar baadhis oo garsoore oggolaaday. Saraakiisha ayaa guriga ka qaaday sanduuqyo dukumenti ah.

Warbixinnadu waxay sheegayaan in baadhistu taabanayso taariikhda dhalashada Ilhaan iyo waraaqaha ay ku heshay jinsiyadda Maraykanka. Waxa kale oo la hubinayaa in aabbaheed, marxuum Nuur Cumar Maxamed, uu xog khaldan bixiyey ama macluumaad ka reebay foomamka socdaalka. Arrimahan ayaa weli ah tuhuno la baadhayo.

Ilhaan Cumar ayaa hawlgalka gurigeeda ku tilmaantay isku day lagu beegsanayo dadka siyaasadda kaga soo horjeeda maamulka Trump, iyadoo hay’adaha fulinta sharciga loo adeegsanayo cadaadis siyaasadeed.

Waxay sheegtay in Trump muddo toban sano ah ku beegsanayey been aan sal lahayn iyo olole sumcad-dil ah, hawlgalkanna uu yahay tallaabadii ugu dambaysay ee cabsi gelintaas. Waxay ku adkaysatay inaan la aamusin doonin.