Aaska oo si heer qaran u dhacay ayaa waxaa ka qeyb galay Ra’iisul Wasaaraha Xukuumadda Soomaaliya Xasan Cali Kheyre, Guddoomiye kuxigeenka labaad, Wasiir, Xildhibaano, Guddoomiyaha Gobolka Banaadir iyo Mas’uuliyiin kale.

Ka hor inta aan la aasin ayaa waxaa salaad janaaso ah lagula dukaday masaajidka Madaxtooyada, halkaasoo uu kaga qeyb galay salaada janaasada Madaxweyne Maxamed C/llaahi Farmaajo oo soo gaabiyay safarkiisii Addis Ababa.

Madaxda dowladda ayaa ka tacsiyadeeyay geerida Wasiirkii Howlaha Guud, waxaana ay alle uga baryeen in naxariistii Janno ka waraabiyo.

Dowladda Federaalka ah ee Soomaaliya ayaa lagu wadaa inay ku dhawaaqdo maalmo baroor diiq qaran ah, iyadoo Madaxweynaha uu shir guddoomin doono shir deg deg ah oo looga hadlayo amniga, iyo dilkii Warii Cabaas Siraaji.

Maxkamadda Ciidamada qalabka sida ayaa la wareegtay Kiiska dilkii xalay, iyadoo xabsiga u taxaabtay labo ka mid ah Ilaalada Hanti dhowrka Guud oo lagu wado in si deg deg ah Maxkamad loo soo taago.